Կոմոտինիում տեղի ունեցավ հայկական մշակույթի "Armenia" երկօրյա փառատոն

29 օգոստոսի, 2022

Հունաստանի Կոմոտինի քաղաքում օգոստոսի 26-ին և 27-ին տեղի ունեցավ հայկական մշակույթի «Armenia» երկօրյա փառատոնը: Փառատոնն ունեցավ մեծ հաջողություն: Փառատոնի կապակցությամբ Սալոնիկում Հայաստանի Հանրապետության պատվավոր հյուպատոս Ակիս Դագազյանը խոսքով հանդես եկավ և պատասխանեց տեղի լրատվականներին, որը ներկայացնում ենք ստորև:

«Նախ և առաջ ցանկանում եմ փոխանցել Հունաստանում Հայաստանի Հանրապետության դեսպան՝ Տիգրան Մկրտչյանի ջերմ ողջույնները և լավագույն մաղթանքները հայկական մշակույթը ներկայացնող այս բացառիկ իրադարձության կապակցությամբ։

Միաժամանակ, ցանկանում եմ շնորհավորել միջոցառման կազմակերպիչներին՝ Կոմոտինիի հայերի մշակութային և կրթական միությանը և Կոմոտինիի քաղաքապետարանի մշակույթի, կրթության և սպորտի հարցերով վարչությանը՝ այս նախաձեռնության ու երջանկահիշատակ Ջենի Կասապյանի երազանքը կյանքի կոչելու համար:

Հայաստանի Հանրապետությունը Սփյուռք ունենալու արտոնություն ունի: Աշխարհով մեկ սփռված հայկական Սփյուռքի Կոմոտինիի գաղութը մեզ բոլորիս իսկական հպարտություն է պատճառում: Այստեղ հայերի ներկայությունը դարերի պատմաություն ունի: Այդ շարունակական ներկայությունն իր հետքն է թողել հույների պայքարներում: Կոմոտինիի հայերն ուրույն դերակատարություն են ունեցել Թրակիան Հունաստանի մեջ ինտեգրելու գործում, իրենց կյանքն են զոհաբերել Ալբանիայի լեռներում՝ մաս կազմելով Ազգային Դիմադրության պայքարի:

Չնայած այն հանգամանքի, որ Կոմոտինիի հայերը լրիվ ինտեգրվել են հունական հասարակության մեջ, նրանց ոչ միայն հաջողվել է պահպանել հայկական ինքնությունը և մշակութային ժառանգությունը, այլ նաև նմանատիպ միջոցառումներով նպաստել հայկական մշակույթի տարածմանը։

Ցանկանում եմ հիշեցնել, որ այս տարի նշում ենք Հունաստանի և Հայաստանի միջև դիվանագիտական հարաբերությունների հաստատման 30-ամյակը։ Նմանատիպ նախաձեռնություններն էլ ավելի են ամրապնդում Հունաստանի և Հայաստանի միջև հարաբերությունները, ընդլայնում մշակութային փոխանակումները, հնարավորություն ընձեռում սկսելու հայկական որևէ քաղաքի հետ Կոմոտինիի քույրացման գործընթացը:»

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր